الرئيسية / طنجة الضاحكة / في حوار “فيكسيون”.. برنارد ليفي يرد على العماري: بْغينا نعْرفو شكون وجه النحس الحقيقي.. وأش أنا ولاّ إلياس..!!

في حوار “فيكسيون”.. برنارد ليفي يرد على العماري: بْغينا نعْرفو شكون وجه النحس الحقيقي.. وأش أنا ولاّ إلياس..!!


طنجة أنتر:

طنجة أنتر: مرحباً مسيو برنارد هنري ليفي. مْعاك موقع “طنجة أنتر”.. سافا؟

ليفي: سافا. ولكن علاش هاد تامارا كلها. عيّط لي غير ليفي وارتاح ورْتّحنا معاك.

طنجة أنتر: أوكي مسيو برن.. عفوا ليفي. هاد الأيام نايْضة ضجة عليك.

ليفي: أنا من ديما منوّض الضجيج. ولكن ما عندي خْبار بآخر ضجة.

طنجة أنتر: رئيس الجهة قال شافك فشي جهة.

ليفي: آش من جهة؟

طنجة أنتر: جهة طنجة تطوان الحسيمة..

ليفي: لا. بغيت نعرف آش من جهة شافوني. حيت أنا بحال الزواق ممكن نكون فأكثر من جهة فوقت واحد.

طنجة أنتر: إذن انت زواااااق اكتر من بّا إلياس. المهم.. رآه إلياس العماري شافك فطنجة وما عجبوشي الحال.

ليفي: وشكون هاد إلياس؟

طنجة أنتر: وراه قلنا لك أمسيو ليفي هاد إلياس هو رئيس الجهة وأشياء كثيرة أخرى.. يعني هو اللّي غنى عْليه سعد المجرد “أنا ماشي ساهل”.

ليفي: اك ما هو “مول البام”؟

طنجة أنتر: تماما. هانت عرفيته.

ليفي: وعلاش ما عجبوشي الحال يشوفني فطنجة. واش هو ورث هاد المدينة وسجّلها بسميّتو؟

طنجة أنتر: وازعما حنا اللي كنسوّلوك أمسيو ليفي الله يهديك. هاد إلياس قال وجودك فطنجة غريب؟

ليفي: لاواه.. إيوا عطيني مهلة باش نضحك (….)الله يخرج هد الضحك على خير. ولكن قولولي واش هاد إلياس العماري طنجاوي وما عجبوش الحال نعمر عليه المدينة؟

طنجة أنتر: تقريبا.. ملّي رجع رئيس جهة هادي عام ونص بدا كيجي لطنجة مرة مرة.. يعني طنزااااوي.

ليفي: إيوا عطيني مهلة أخرى باش نضحك. اسمع الشريف. إذا شفتو هاد رئيس الجهة قولو ليه برنارد هنري ليفي طنجاوي مخزّز. وأنا شريت دار فهاد المدينة قبل ما يسمع إلياس بمدينة اسمها طنجة. ودائما كنتحرك فالزناقي والدروبا وكنشرب أتاي فالحافة ولا فالسوق الداخل. واللّي ما عجبوشي الحال يشرب البحر.

طنجة أنتر: يا ودي إلياس العماري ما عندوشي مشكل يشرب البحر. هو كيشرب كلشي. ولكن هو كيقول راك انت علامة شؤم.. وكيسمّيواك غراب الثورات، وأي بلاد كتظهر فيها كتصاب بالفوضى، بحال ليبيا واليمن وسوريا وما إلى ذلك.. ودابا انت فالمغرب ويمكن لحراك الريف يتحول لشي حاجة خايبة؟

ليفي: اسمع أولدي. أنا فطنجة هادي أربعين عام وما عمرو وقع شي حاجة، والنهار اللي وصل إلياس العماري لرئاسة جهة طنجة تطوان الحسيمة ناضت قربالا فالحسيمة وناضت الاحتجاجات فطنجة على أمانديس وشعلت فوزان احتجاجات العطش وتفجرت الفضائح الجنسية لكليات تطوان وكلاو الناس العصا فالقصر الكبير وزيد وزيد. شكون دابا اللي وجه شؤم واش أنا ولا هو؟!

طنجة أنتر: دابا بغيتينا نكذّبو إلياس المسلم ونتيّقوك انت أمسيو ليفي؟

ليفي: تيّق ولا كاع ما تيّق. ونزيدك.. النهار اللي كان أخ إلياس عمدة ديال طنجة كانت فضيحة كْبيرة. راجل ما كيهضر حتى لغة أجنبية رجع عمدة ديال مدينة متعددة اللغات وكانت منطقة دولية مشهورة. والفوضى فالعقار حطمت فعهدو ارقام قياسية، وشوفو العمارات اللي بناهم فؤاد العماري بحالهم بحال الويل. ولولا الوالي اليعقوبي اللي وقّفو عند حدو لكانت طنجة مشات فيها كفتة. هاد الشي كلّو وكيْسمّيني غراب الثورات. إذا كنت أنا غراب الثورات حصنا نسمّيو إلياس “أناكُونْضا الانتفاضات”.

طنجة أنتر: واه واه أمسيو ليفي. قلبك عامر على العماري.

ليفي: قلبي عامر على النفاق والمنافقين. يسير يشوف شكون وجه النحس الحقيقي على هاد البلاد ويميّك على طاصيلْتي. باي باي عليكم أخوتي المشْلمين.

اضف رد

لن يتم نشر البريد الإلكتروني . الحقول المطلوبة مشار لها بـ *

*

إلى الأعلى